Wenche Schanke Eikum

Wenche Schanke Eikum (1971) har arbeidd for NRK Nynorsk mediesenter sidan 2005. Ho er ansvarleg for all ekstern kursverksemd.

Eikum var busett midt i Ivar Aasen-land dei første seks leveåra. Då budde ho på Sunnmøre i Volda sentrum. Før skulestart flytta familien til bygda Nautvik i Dalsfjorden, også det i Volda kommune. No for tida er ho busett på Sandane i Nordfjord. Ho har utdanning i norsk, historie, pedagogikk og media frå Høgskulen i Volda.

Journalistisk røynsle

Då Eikum var ferdig med utdanninga i 1994 byrja ho i NRK Sogn og Fjordane som journalist. Der arbeidde ho først med nyhende på radio. Etterkvart byrja ho som programleiar på morgonsendinga. Frå 1997 veksla ho mellom morgonarbeid på radio, og arbeid som reporter på fjernsyn på Vestlandsrevyen. Då ho slutta i NRK Sogn og Fjordane i desember 2003 hadde ho også prøvd seg som vaktsjef for alle magasinprogramma. Gjennom jobben har ho blitt godt kjend med folk og geografi i heile Sogn og Fjordane.

Glad i nynorsken

Nynorsk har alltid vore hovudmålet til Wenche Eikum. Også i studietida med forelesarar som skreiv og snakka bokmål, omsette Eikum notatane sine til nynorsk.
- Det var viktig både for eiga læring og identitet å bruke nynorsk, seier ho. Sjølv om aldri har engasjert seg i mållagsarbeid, har ho vore ein varm forkjempar for nynorsken.

Engasjert jente

Eikum har alltid vore aktivt med i kyrkje- og organisasjonsliv. I fleire år var ho ansvarleg for radioarbeidet til Pinsekyrkja i Volda, i tillegg til å vere med i barne- og ungdomsarbeidet. Ho spela klarinett i det som heitte Folkestad skulekorps i 14 år, i tillegg til å engasjere seg i elevråd og russestyre. Ho har også sunge i fleire kor, først i Volda og sidan i Førde.

I dag er ho med i leiinga av Pinsekyrkja på Sandane. Og bruk av nynorsk i kyrkje- og organisasjonsarbeid er ei sjølvfylgje for Eikum. No brukar ho mykje av engergien sin til å få andre til å vere stolte av målforma og målføret sitt. Mange legg av seg språket sitt når dei blir intervjua av media. Gjennom arbeidet som kursansvarleg i NRK Nynorsk mediesenter ynskjer Eikum å gje folk sjølvtillit til å stille opp i media, og bruke målet sitt på ein god måte.