Kvar einaste kveld, heilt til ni år gamle Simon og faren Fkade er tilbake i Florø, skal støttegruppa helde apell på torget i byen. Måndag var eg i Florø for å dekke støtteaksjonen i den såkalla Simon-saka.
For tre veker sidan vart dei to sende ut av landet, og tilbake igjen til Italia. Der lever dei under kritikkverdige tilhøve. Dei bur i ein park saman med narkomane, prostituerte og andre asylsøkjarar, og dei søv under open himmel.
Saka har fått stor merksemd i media den siste tida, og 4000 menneske har signert på oppropet for å få dei to tilbake til Florø igjen.
Simon-saka har vakt oppsikt lokalt og nasjonalt. Fleire politiske parti har teke til ordet for at regjeringa sin asylpolitikk er feil, og at dei to fortener å kome attende til lokalsamfunnet i Florø.
Underskriftsaksjonen tok støttegruppa til Oslo der dei møtte politisk rådgjevar for arbeids- og inkluderingsminister Dag Terje Andersen.
Men der fekk dei beskjed om at underskriftskasjonar ikkje kan endre vedtak som UDI og Utlendingsnemnda har gjort. Årsaka er at politikarane ikkje skal blande seg i slike saker.
Men framleis er guten og faren Fkade Thaye i Italia. Difor held støttegruppa fram med aksjonen. No skal dei stå på torget i Florø kvar einaste kveld til dei to er tilbake i kystbyen.
- Vi skal stå her kvar kveld, sjølv om det snør og sjølv om det tek eit halvt år, seier Kåre Leif Hollevik som leier støttegruppa.
Saka vart sendt i programmet Her&Nå på NRK P1 i dag. Det er landets største nyheits- og aktualitetsmagasin med over 600 000 lyttarar kvar einaste dag. Høyr saka her.
Saka gjekk også i Dagsnytt, i Fylkesnytt, og i ettermiddagssendinga til NRK Sogn og Fjordane.