Pang! Læringskurva er bratt. Om ikkje lenge skal vi vere i stand til å rapportere på direktesendt radio og fjernsyn, i tillegg til å kunne produsere saker på nett, radio og fjernsyn.
Har hatt mange mareritt om hjerneteppe og skjelvande stutring når dei første orda kjem fram. Litt skummelt, men det blir spennande å prøve.
Men eg ser fram til å bli sett i arbeid, og eg kjenner at det klør i fingrane. Eg er rastlaus. Eg vil ut å produsere saker.
Det går fort i svingane, og vi har allereie fått prøve oss på mange ting. Vi vart etter berre fire dagar på skulebenken send ut for å prøve oss som radioreportarar. Her på mediesenter lærar vi det, ved å gjere det. Vi har fått opplæring i dataprogramma som vi må kunne for å fungere i NRK-systemet, og nye ord og uttrykk er printa inn hovuda våre. Topp. Intro. Blokk. Kontentum. Bulleteng. Anslag. Sync.
Etter nærare fire år i lokalavis, er eg no på veg inn i ein annan del av medieverda. No skal eg få prøve noko nytt. Eg skal formidle journalistikk med stemma mi. Det er uvant, men spennande.
Men prinsippa i media og etermedia er på mange måtar dei same. Det handlar heile tida om å prøve å vere alkymist – å prøve å lage gull av gråstein. Det handlar om å finne ut kva som interesserer folk.
Eg ser fram til dette halvåret, og eg gler meg! Eg tykkjer det er stas å ha kome inn på NRK Nynorsk mediesenter, og spesielt å vere den yngste nokon sinne.
- Frå mitt tidlegare liv som redaktør veit eg at det stundom dukkar opp purunge folk som berre veit at dei skal bli journalistar og røynsla mi er at dei ofte vert gode. Det er kjekt å gje slike ivrige ungdomar ein sjanse, seier Magni Øvrebotten til firdaposten.no.