NRK-bloggen

Lydopptakar, penn og papir, og kamera er viktige hjelpemiddel for journalistar. Men bilen er minst like viktig. For i eit fylke som Sogn og Fjordane blir det mykje farting.

Her i fylket bur folk der ingen skulle tru at nokon kunne bu. Sjølv om eg er frå fylket sjølv, så er det mange stader eg ikkje har vitja. Som reporter må ein oppsøke krinkelkrokar som ein elles ikkje ville sett.

Eg har funne meg godt til rette i journalisttilveret. Det er eit gjevande yrke, og det er kjekt å møte nye folk og oppleve nye ting kvar einaste dag. Alt frå heimebesøk hos gamle damer til blålysturar med brannbilar på øving. Kvar einaste dag får ein prøve seg på noko nytt, og kvar einaste dag skal ein møte nye folk og oppsøke ukjende stader.