I dag hadde vi vår første dag nede på desken. Det var travelt, men utruleg kjekt! Ringerunde til stortingsrepresentantar har eg ikkje kvar dag, men eg merka meg fort at dei hadde snakka med min like før, og var enkle å få i snakk. Fekk lappa saman ei sak i hurten og sturten (for meg hurten og sturten), og saka om stortingsrepresentantar sitt syn på kritikken mot leiinga i Helse Førde, vart sendt i ettermiddagssendinga. Å få tildelt ei slik sak på min første dag på desken, tar eg som eit tillitsteikn.
Eg har vore sengeliggande med influensa i fire dagar, og bulletengdagen med Tone Lin i går, var sterkt prega av pusting og hosting i studio frå mi side. Sjarmerande.
Men om høvet byr seg, vil eg likevel svært gjerne prøve meg som bulltenglesar ein gang eg har litt større lungekapasitet.
For ordens skuld, skal eg nevne at eg i helga skreiv ein lang blogg om forrige veke, som eg diverre klarte å slette.. arrgs.
Det var i alle fall ei fantastisk veke med TV. Gunn Evy, Astrid og meg for til Viksdalen for å filme ungar som var på matskule midt i vinterferien sin, og resultatet av den turen fekk vi sjå på Vestlandsrevyen på fredag. Tv-debut der altså.
Vi var også på besøk på Aasentunet forrige veke. Der fekk vi omvisning på museet, og foredrag om språk av Ottar Grepstad. Vi såg også ein film om Ivar Aasen, der faren til Ingvil var statist.
Sjølve turen opp til Volda var heilt fantastisk! Sola skein på blå himmel, og vi såg kvite sunnmørsalpar i horisonten. Det var også veldig kjekt å sjå kor fint og forseggjort det var på museet. Sjølvet bygget er teikna av Sverre Fehn, og berre det er jo god nok grunn til å reise dit. Men på Aasentunet har dei også bygd opp att den gamle stova til Aasen, noko som balanserte museum og opplevingssenter godt. Innandørs har dei laga ei historisk vandring gjennom bygget som starta med Aasen sin død, og enda i fødsel. Ein fin vri. Arvingane til Aasen arva alle 250(?) eigendelene hans, og dei er utstilt på museet. Blant dei finn ein dei berømte tøflene hans og ein heil haug med billettar, tobbakspapir og kvitteringar som Aasen nytta til å skrive på. Ikkje rart han har skrive på alt han kom over, det må ha vore tungt nok å bere pulten sin rundt heile landet, om ein ikkje skulle dragse med seg ein heil haug notatbøker i tillegg.
I morgon får vi besøk av Roy på loftet. Han skal fortelle oss kva som blir forventa av oss nede på desken. Då får eg nok vite om eg gjorde nokre store blemmer på prøvedagen min i dag.. I tilfelle skal eg i alle høve vera budd til mitt nye journalistliv førstkomande tysdag!
