I dag er det fire veker sidan eg starta praksisen min i Bergen. Fram til no har eg som kjent vore i redaksjonen til Førkveld, men i dag har eg flytta inn i DK-redaksjonen.
Førkveld hadde si siste sending for vårsesongen førre fredag. Som avslutning på praksisperioden min der, fekk eg bli med på to-dagars seminar på Kjepsofloten i Hardanger med heile gjengen. Eg har blitt utruleg godt tatt vare på desse vekene, og var sjølvsagt kjempeglad for å få bli med på tur. Seminaret var meint som ei oppsummering av sesongen (kva har fungert og ikkje?), i tillegg til å sjå framover mot neste sesong (nye idear!). Sjølv om eg ikkje har vore med frå starten av, var det veldig interessant å få eit innblikk i korleis redaksjonen tenkjer å utvikle programmet vidare. I strålande sommarvarme gjekk det meste føre seg utandørs, både seminar, måltid og sosialt samvær. Det var ein fin måte å bli endå betre kjent med kollegaene på, og ramma rundt det heile kunne ikkje vore betre! (Her lovar eg å legge ut bilete!)
No er mi tid i Førkveld over for denne gong. I dag starta eg på nett-desken der eg blir verande ei stund framover, før eg avsluttar med to veker radio mot slutten av praksisperioden. Eg er glad for å få jobba på fleire plattformer her i Bergen òg, for som alltid er det viktig å kunne ha fleire bein å stå på i ein framtidig jobbsituasjon. Og i motsetnad til redaksjonen i Førde, er det ingen her som veit kva eg kan før eg har fått vist det.. Polopoly (publiseringsverktøyet for internett) hadde heldigvis ikkje forsvunne heilt i gløymeboka, så etter litt knoting i starten gjekk det veldig greit. Og det er bra, for så fort praksisperioden er slutt går eg rett over i sommarjobb som nettjournalist her og her. For ei friluftsglad jente frå Voss, blir jo det den perfekte sommarjobb! 