Fredag ettermiddag pakka eg og Mari kamerautstyr og køyrte til Kalvåg for å dekke verdspremieren på ein tysk spelefilm som blei laga i den vesle bygda i fjor sommar. Lokalbefolkninga hadde medverka i filmen, difor var det stor ståhei då dei endeleg skulle få sjå resultatet.
Eg var reporter,medan Mari filma. TV-saka gjekk både på Vestlandsrevyen og på Norge i dag.
Medan Mari redigerte TV-saka, laga eg ein reportasje til radio om verdspremieren. (Reportasjen startar ca 15min og 50sek ute i sendinga).
Laurdag var eg ute med Simon for å foreviga slutten på bompengeinnkrevjinga for Sunnfjordtunnelen mellom Førde og Florø.
Denne gongen skulle eg prøve meg bak kamera. Då fekk eg erfare at det ikkje er så lett å filme i regn. Det dumme regntrekket som eg måtte ha på kamera gjorde det vanskeleg å finne dei rette knappane i ein fei. Men det er nå slike utfordringar som ein må møte på før eller seinare. Og jo før, jo betre!
Det blei ei travel helg med mykje jobbing, men kva gjer vel det når jobben er så kjekk! Eg føler at eg fekk prøvd meg på veldig mange forskjellige ting, og håpar eg får høve til å dra ut på fleire slike oppdrag i internpraksisen.
No har eg hatt to veker praksis på nettet i NRK Sogn og Fjordane, og i morgon startar eg på fjernsynsdelen. Første dagen skal eg vera med eit team ut på oppdrag, for å sjå korleis dei produserer ei TV-sak frå A til Å. Det blir heilt sikkert veldig lærerikt å sjå korleis dei erfarne reporterane og fotografane arbeidar saman. Eg skal notere flittig i blokka mi!