Det var eit fullspekka program me skulle gjennom i løpet av dei få dagane me var på vitjing i hovudstaden. Omvising på Marienlyst, TV2 og Austlandssendinga, middag med NRK FleRe og kulturelt innslag på det Norske Teater.
Særleg spanande var det å få eit innblikk i kvardagen på Marienlyst. Det va fem forventningsfulle og nyfikne jenter som møtte opp i sjølvaste kjernen til kringkastingsgiganten torsdags morgon. Litt problematisk var det å finne fram i den store labyrinten av eit bygg, men me kom oss gjennom programmet til slutt.
På tapetet stod omvising i dei ulike redaksjonane på huset som til dømes Dagsrevyen, Dagsnytt og Sporten, lunsj med eks-praktikantar og møte med Ingvil Bryn. Ho påpeika at oversetjing frå bokmål til nynorsk i ein hektisk kvardag kan by på utfordringar. Bryn oppfordra oss dessutan til å vera fleksible, observante og positive når me i mai skal ut i praksis.
På sporten fekk med høyre litt om korleis prosjektkomiteen til OL-sendinga har førebudd seg i over to år for at dette skal gå knirkefritt. Litt av eit forarbeid og enormt med logistikk som skal i orden for at me nordmenn skal kunne følgje med Bjørndalen&Co i jakta på gullet i Vancouver!
Praktikantane som no er i praksis i Oslo og eks-praktikantar hadde også mange gode tips og erfaringar som dei ville dele med oss. Alt i alt fekk eg inntrykk av at dei ulike redaksjonane på Marienlyst er positive til å ha oss nynorskpraktikantar i lære. Å vera tilpassingsdyktig, hardtarbeidande og gla i utfordringar ser ut til å vera viktige eigenskapar for å kome langt.
Og med litt spisse olbogar attpåtil, så kjem ein kanskje lenger enn langt?
