Førde spelte kvalifiseringskamp om opprykk til 2. divisjon på laurdag. Der var eg, med meg hadde eg fotoapparat, P2-kamera og mobil. Kampen skulle verte dokumentert.
Sjølv om eg følte meg "på", fekk eg ikkje skutt nokon av måla. Førde tok leiinga, før eg hadde fått sett telelinsa på kamera, etter 48 sekund! Det var ein del av lærdommen om at idrettsarrangement er vanskelege å knipse/filme.
Erfaringa er vel at det er vanskeleg å få både fullgode stillsbilete og video. Det handlar om prioriteringar, fekk eg høyre i dag då eg leste inn kommentaren til nettsaka. Prioritere gjorde eg på eit vis, prioriterte både STK til Vestlandsrevyen og bilete til nettet.
Førde vann 2-1 over Birkebeineren frå Drammen. Med det rykka dei opp ein divisjon, noko som gav grunn til feiring med champagne i garderoben.