No har eg nett starta på den fjerde veka mi her i Dagsnytt, og så langt har det vore ei svært positiv oppleving. Eg har blitt teken godt imot frå fyrste dag, og har fått jobbe med mykje spennande. Læringskurva er bratt, og eg trivst godt med variasjonen mellom å jobbe dagsaktuelt på desken og meir langsiktig med eigne idéar i reportasjegruppa.

Du tenkjer kanskje at nyhende er noko einsarta, men den korte tida i Dagsnytt har eg verkeleg fått oppleve at det ikkje stemmer. Eg har arbeidd med alt frå reportasje om nordmenn sine sexvanar, til kronprinsesse Victoria, så jobben blir på ingen måte kjedeleg! Nett som i Førde er den store snakkisen eit tema i redaksjonen, så det gjeld å finne det som folk er opptekne av her og no. Eg tek imot alle tips med takk!

Hovudstaden har òg synt seg frå si beste side sidan me kom, så velkomsten har vore varm på fleire måtar!

Eg skal få lagt ut sakene mine seinare denne veka.

PS. Og eg har aldri før gått ein skule der eg har fått praktisk bruk for absolutt ALT eg har lært. Men ein gong må bli den fyrste - og Nynorsk mediesenter er verkeleg det perfekte utgangspunktet for å jobbe andre plassar i NRK. Det var dagens reklame til dei fem nye.