Medietrening og skrivekurs

Same kva verv eller posisjon du har i dag vert det forventa at du taklar media når det krevst. Det er sjeldan ei medfødd evne, men det nyttar å trene. 

Føremålet med kursverksemda vår er å gje folk kunnskap om og trening i media, slik at dei blir trygge og frimodige nok til å delta i samfunnsdebatten. Særleg ynskjer vi å nå kvinner, dialekt- og nynorskbrukarar og utkantbuarar, for å få fleire av dei med i mediebiletet. Det er viktig for demokratiet vårt at deltaking i media ikkje vert for dei få, og at media ikkje er eit lukka land for utanforståande.

NRK Nynorsk mediesenter driv ikkje medierådgjeving eller kurs i korleis du vrir deg unna media. Kven vi held kurs for ser du i tilbakemeldingane. 

Det skal ikkje brukast lisenspengar til kursverksemda, difor må kursa våre vere sjølvfinansierande. Dei eignar seg for privat- og offentleg verksemd, lag- og organisasjonar og einskildpersonar som går saman om å kjøpe seg eit kurs.

Vi skreddarsyr kursa for kursdeltakarane, og lagar oppfølgingskurs om det er ynskjeleg. Kursa held vi i lokala våre i Førde  - med tilgang til profesjonelle studio - eller der oppdragsgjevaren ynskjer.